Навіны рэспублікі

Масавую ўборку збожжавых культур і рапсу ў Беларусі плануюць пачаць 18-20 ліпеня

У Беларусі масавую ўборку збожжавых культур і рапсу плануюць пачаць 18-20 ліпеня. Аб гэтым расказаў карэспандэнту БЕЛТА начальнік галоўнага ўпраўлення раслінаводства Міністэрства сельскай гаспадаркі і харчавання Мікалай Лешык.

"Цяпер масава ўбіраем азімы ячмень. Адзінкавыя сельгасарганізацыі рэгіёнаў памаленьку пачынаюць уборку азімай пшаніцы, ёсць невялікія плошчы ўбранага азімага рапсу. У сувязі з гэтым гаварыць глабальна пра ўборачныя работы пакуль рана. Папярэдне плануем пачаць масавую ўборку збожжавых культур і рапсу 18-20 ліпеня", - сказаў Мікалай Лешык.

Ён таксама дадаў, што выпадзенне ападкаў нівеліравала складаную сітуацыю на палях і вільгацезабеспячэнне глебы палепшылася. "Ідзе інтэнсіўнае наліванне зерня ў пшаніцы, трыцікале і жыта. У ячменю назіраецца васковая спеласць, і павелічэнне ўраджаю за кошт налівання зерня ўжо не адбываецца. Пры гэтым пасевы рапсу яшчэ зялёныя, што сведчыць аб працэсе павелічэння масы збожжавых. Гэта не можа нас не радаваць", - адзначыў начальнік галоўнага ўпраўлення.

Спецыяліст дадаў, што паводле папярэдніх падлікаў з улікам ацэнкі біялагічнай ураджайнасці асобных участкаў у гэтым годзе чакаецца ўраджай у межах 6,5 млн т збожжа пры мінулагоднім больш як 7,8 млн т.

"Перавод плошчаў кукурузы, пасеяных на зерне, для ўборкі на кармы - гэта экстранная мера, якая будзе ажыццёўлена ў выпадку, калі ў нас не атрымаецца кампенсаваць недабор травяных кармоў. Акрамя таго, кіраўнік дзяржавы падтрымаў закупку збожжа ў Расіі ў сувязі з больш нізкімі цэнамі на рынку, чым у мінулым годзе. Але ўсё ж мы прадаўжаем спадзявацца, што другі і трэці ўкос люцэрны адрастуць, а мы атрымаем ураджай згодна з запланаванымі лічбамі, і звяртацца да крайніх мер не давядзецца", - падкрэсліў Мікалай Лешык.

БелТА