Навіны вобласці

Каля 50 паэтаў сталі фіналістамі конкурсу на «Віцебскім лістападзе»

Конкурс паэтаў на XXXVII Адкрытым фестывалі аўтарскай песні, паэзіі і візуальных мастацтваў "Віцебскі лістапад" аб'яднае амаль 50 фіналістаў і пройдзе ў фармаце майстар-класаў. Аб гэтым сёння на прэс-канферэнцыі ў Віцебску, прысвечанай міжнароднаму праекту, паведаміла куратар намінацыі "Паэзія" Алена Крыклівец, перадае карэспандэнт БЕЛТА.

Заяўкі на форум па ўсіх паэтычных намінацыях прыслалі 80 чалавек, 48 з іх па рашэнні журы сталі фіналістамі, якіх чакае барацьба за права называцца лаўрэатамі.

"Пераважна мы атрымлівалі заяўкі з Беларусі і Расіі. Што датычыцца Расіі, тут шырока прадстаўлена геаграфія: Санкт-Пецярбург, Барнаул, Краснадар, Падмоскоўе, - сказала Алена Крыклівец. - Другі год запар конкурс у намінацыі "Паэзія. Свабодная тэматыка" і "Паэзія. Песенны тэкст" не зусім звычайны - у выглядзе майстар-класаў. Майстры вядуць групы ад 5 да 8 чалавек, арганізуюць паўнацэнныя семінарскія заняткі. Усе ўдзельнікі абмяркоўваюць прысланыя на конкурс творы і выстаўляюць адзін аднаму ацэнкі - гэта паўнацэнны фармат літаратурнага інстытута".

Такая форма правядзення дазваляе аўтарам атрымаць зваротную сувязь ад калег па паэтычным цэху, кіраўнікоў майстар-класаў, членаў журы. "Намінацыі ўключаюць у сябе амаль тэатральнае прачытанне мастацкага тэксту. На мой погляд, гэта адзін са спосабаў папулярызацыі паэзіі ў цэлым. І відэапаэзія - інтэрнэт-фармат, калі аўтар здымае кліп, або буктрэйлер, на свой твор. Такія відэаролікі таксама можна будзе ўбачыць на фестывалі", - растлумачыла куратар намінацыі "Паэзія".

Журы ацаніла гэтыя творчыя работы, а імёны лаўрэатаў стануць вядомы на гала-канцэрце форуму, дадала яна.

Паэтычная праграма "Віцебскага лістапада" стартуе 20 кастрычніка ў 15.00 з турніру на агляднай пляцоўцы выставачнай залы "Духаўскі круглік". Асобны канцэрт члены журы намінацыі, лаўрэаты і госці фестывалю дадуць 22 кастрычніка ў 12.00 у Цэнтры культуры "Віцебск". Тут жа ў 14.30 правядзе майстар-клас член журы конкурсу і паэт Ніка Батхен - размова пойдзе аб інтуітыўнай і тэрапеўтычнай паэзіі.

"Паэтычны канцэрт прымеркаваны да Года міру і стварэння і складаецца з выступленняў членаў журы і лаўрэатаў фестывалю. Прысвечаны ён будзе сямейным каштоўнасцям, адносінам дзяцей і бацькоў - усяму таму, што сёння кожнаму чалавеку дае сілы, духоўнае напаўненне і апору", - сказала на заканчэнне Алена Крыклівец.

XXXVII Адкрыты фестываль аўтарскай песні, паэзіі і візуальных мастацтваў "Віцебскі лістапад" адбудзецца з 20 па 22 кастрычніка. Форум прымуць адразу некалькі пляцовак, уключаючы канцэртную залу "Віцебск", гарадскі Цэнтр культуры, выставачную залу "Духаўскі круглік", Віцебскі мастацкі музей і абласную філармонію.

БелТА