Навіны вобласці

Гарадок прыме чацвёрты этап Кубка Беларускай федэрацыі біятлона

Гарадок 24-27 студзеня прыме 4-ы этап Кубка Беларускай федэрацыі біятлона. Аб гэтым карэспандэнту БЕЛТА паведамілі ў Віцебскім абласным цэнтры алімпійскага рэзерву па зімовых відах спорту.

Гонкі пройдуць на біятлоннай трасе Віцебскага абласнога цэнтра алімпійскага рэзерву па зімовых відах спорту. Каманды прыбудуць сюды 24 студзеня, на наступны дзень у іх запланаваны афіцыйныя трэніроўкі. Барацьба за першыя медалі разгорнецца 26 студзеня. Адкрыюць праграму спаборніцтваў мас-старты ў юнакоў (10 км) і дзяўчат (7,5 км) 2005-2006 гадоў нараджэння. У суботу юных спартсменаў чакае змешаная эстафета і гонка праследавання.

Спаборніцтвы збяруць прадстаўнікоў усіх рэгіёнаў краіны і сталіцы. Усяго за перамогу будуць змагацца сем каманд, у складзе якіх каля 150 спартсменаў. Выступяць яны ў чатырох узроставых катэгорыях, самым малодшым біятланістам 11 гадоў. Па выніках 4-га этапу Кубка Беларускай федэрацыі біятлона разыграюць восем камплектаў медалёў. Лепшых вызначаць у асабістым і камандным заліку ва ўсіх катэгорыях.

Віцебскую вобласць на спаборніцтвах прадставяць 28 спартсменаў. "Склад у нас моцны, паколькі мы апярэджваем і Мінск: цяпер маем 1966 ачкоў, у Мінска ж набрана 1703 ачкі. Які год запар каманда Віцебскай вобласці выйгравала ў гэтых спаборніцтвах. Біятланісты, якія ўваходзяць у яе склад, - прызёры гарадскіх, абласных і рэспубліканскіх спаборніцтваў. Чарговы раз каманда мае намер прынесці Кубак федэрацыі біятлона, - адзначылі ў Віцебскім абласным цэнтры алімпійскага рэзерву па зімовых відах спорту. - Пасля этапу Кубка федэрацыі старэйшыя ўзроставыя групы будуць рыхтавацца да ўдзелу ў першынстве Рэспублікі Беларусь па біятлоне, якое пройдзе ў Рэспубліканскім цэнтры алімпійскай падрыхтоўкі па зімовых відах спорту "Раўбічы" 4-8 лютага".

БелТА