9 декабря 2015

АНЁЛЫ Ў ФОРМЕ

Супрацоўнікі Сенненскага аддзялення Дэпартамента аховы МУС Рэспублікі Беларусь выратавалі жыццё пенсіянеру, аказаўшы яму дапамогу да прыезду медыкаў.

Супрацоўнікі Сенненскага аддзялення Дэпартамента аховы МУС Рэспублікі Беларусь выратавалі жыццё пенсіянеру, аказаўшы яму дапамогу да прыезду медыкаў.

Жыхару раённага цэнтра Уладзіміру Сямашку пашанцавала, што ў той дзень экіпаж у складзе міліцыянера-вадзіцеля Дзмітрыя Магеры і міліцыянера-кінолага Андрэя Мезаўцова патруляваў у раёне вуліцы Машэрава.

Ля гасцініцы пажылы чалавек, які быў з жонкай, раптоўна адчуў сябе блага. Пенсіянер страціў прытомнасць. На дапамогу прыйшлі мінакі, якія выклікалі «хуткую». Аднак лік ішоў на секунды: пульс у мужчыны адсутнічаў, вусны пасінелі. Па шчаслівым супадзенні міма праязджалі міліцыянеры групы затрымання ўзвода міліцыі аддзялення Дэпартамента аховы. Дзмітрый Магера і Андрэй Мезаўцоў без прамаруджання аказалі пенсіянеру першую даўрачэбную дапамогу, дзякуючы якой мужчына застаўся жывы.

«Прыемна ўсведамляць, што людзі ў форме могуць не толькі ахоўваць маёмасць, лавіць злачынцаў, але і валодаюць усімі неабходнымі ведамі па медыцынскай падрыхтоўцы, якія дазваляюць рэальна ратаваць чалавечыя жыцці. Такія супрацоўнікі — сапраўдны гонар праваахоўных органаў!» — напісалі ў падзячным лісце, дасланым на імя начальніка абласнога ўпраўлення Дэпартамента аховы МУС, родныя выратаванага.

Старшы сяржант міліцыі Андрэй Мезаўцоў у аддзяленні аховы служыць каля 6 гадоў. Уладкаваўся пасля службы ў арміі. Яго напарнік, старшына Дзмітрый Магера, паспеў папрацаваць у адным з сельгаспрадпрыемстваў раёна, жыллёва-камунальнай гаспадарцы. Але ў выніку свой выбар зрабіў на карысць сапраўднай мужчынскай прафесіі. Вось ужо два гады як ён служыць у аддзяленні аховы.

Абодва сенненцы перад тым, як заступіць на службу, прайшлі падрыхтоўку ў вучэбных цэнтрах Міністэрства ўнутраных спраў, дзе ў шэрагу іншых прадметаў выкладаліся і асновы аказання даўрачэбнай дапамогі пацярпелым. Як бачна, навуку хлопцы засвоілі на выдатна.

Наш кар.
Фота Ірыны ХАСАНАВАЙ.