Навіны раёна

Падраздзяленне па справах непаўналетніх органаў унутраных спраў Рэспублікі Беларусь адзначыла 85-годдзе з дня ўтварэння

У сувязі са знамянальнай датай начальнік Сенненскага РАУС Віктар Пракаповіч і намеснік начальніка - начальнік грамадскай бяспекі Віктар Наваковіч павіншавалі са святам і ўручылі грашовы сертыфікат ветэрану органаў унутраных спраў, былому старшаму інспектару інспекцыі па справах непаўналетніх Аляксандру Даукшасу.

- Дзеці - наша будучыня, таму вельмі важна своечасова заўважыць, калі ў маладога чалавека з'яўляецца спакуса звярнуць з правільнага жыццёвага шляху, дапамагчы падлеткам не спатыкнуцца, а тым, хто ўжо зрабіў памылку ў жыцці, выправіць яе і не дапусціць паўтору, - адзначыў Віктар Пракаповіч.

З гэтай задачай сёння выдатна спраўляюцца супрацоўнікі ІСН Яўген Ляўко і Уладзіслаў Пракаповіч. Пра гэта сведчыць і Падзячнае пісьмо УУС Віцебскага аблвыканкама маці   старшага лейтэнанта міліцыі Яўгена Ляўко Аксане Васільеўне за выхаванне сына, які з гонарам і годнасцю выконвае задачы па забеспячэнні бяспекі грамадзян, грамадства і дзяржавы.

Дарэчы

Гэта міліцэйская служба была створана 19 чэрвеня 1935 года і называлася спачатку дзіцячым пакоем міліцыі. З развіццём грамадства мяняліся формы і метады выхавання падрастаючага пакалення, мяняліся назвы падраздзялення і яго структура, але задача заўсёды заставалася ранейшай - дапамагчы падлеткам, якія апынуліся ў складанай жыццёвай сітуацыі.

«Голас Сенненшчыны» , Ларыса МУКАМОЛАВА.

Фота прадастаўлена Сенненскiм РАУС.