Навіны раёна

Калі рабіць усё абдумана, будзе вынік, упэўнены лекар агульнай практыкі Яўген Каўшоў, які ўзначальвае Яноўскую ўчастковую бальніцу

Лекар агульнай практыкі Яўген Каўшоў, 36 гадоў узначальваючы Яноўскую ўчастковую бальніцу, якая з'яўляецца яго першым і адзіным месцам працы, апынуўся разам са сваім калектывам у авангардзе барацьбы Сенненскіх медыкаў з каранавiруснай інфекцыяй.

Яноўская бальніца для прыёму пацыентаў з падазрэннем і хворых СОVID-19 была перапрафіліравана першай.

- Сітуацыя склалася так, што на падрыхтоўку было вельмі мала часу. 4 красавіка нашых хворых пераправілі ў медустановы Багушэўска, Машканаў, Ходцаў, амбулаторны прыём перанеслі ў будынак комплекснага прыёмнага пункта. А на наступны дзень ужо прынялі пацыентаў, якія з'яўляліся кантактамі першага ўзроўню. 25 красавіка сталі паступаць хворыя каранавiрусам. Баяцца або панікаваць было папросту няма калі. Трэба было рабіць сваю працу. Свядомасць неабходнасці нашай дапамогі дапамагла зарыентавацца.

Працавалі і зараз працуем у цесным кантакце з галоўным урачом Сенненскай ЦРБ Андрэем Какойчанка, які каардынуе нашы дзеянні. Калі рабіць усё абдумана, то ўсё і атрымаецца, як трэба, - кажа Яўген Васільевіч.

У Яноўскай бальніцы не памёр ні адзін пацыент, ні адзін медработнік не заразіўся.

Наогул сітуацыя з каранавiрусам магла быць менш напружанай, калі б усе паставіліся да рэкамендацый медыкаў адказна, лічыць лекар.

- У пачатку пандэміі людзі больш выконвалі правілы, якія дазваляюць засцерагчы сябе і іншых. Цяпер сталі ставіцца да інфекцыі, можна сказаць, легкадумна. А  любы выпадковы кантакт можа апынуцца небяспечным. З надыходам лета да бабуль і дзядуль прыехалі ўнукі з вялікіх гарадоў. Пра што толькі думаюць гэтыя бабулі, ды і іх дзеці? - абураецца медык, не па чутках ведаючы аб каранавiрусе. - А яшчэ трэба сказаць, што некаторыя людзі кідаюцца ў крайнасці. Адны тэлефануюць з нагоды і без нагоды, іншыя замоўчваюць прыкметы захворвання і кантакты з хворымі. Хваробы не трэба баяцца панічна, але і не трэба ігнараваць яе. Трэба шукаць залатую сярэдзіну і прыслухоўвацца да свайго арганізму, - кажа Яўген Каўшоў. Гэты савет дасведчанага лекара варта ўзяць на ўзбраенне.

Сёння медустанова вяртаецца да звыклай паўсядзённай працы. Галоўны лекар і яго калектыў з гонарам справіліся з ускладзенай на іх задачай. Думаецца, што інакш і быць не магло. Аб прафесіяналізме і кампетэнтнасці Яўгена Каўшова можна меркаваць па ацэнцы яго працы дзяржавай. Лекар простай сельскай бальніцы з'яўляецца стыпендыятам Прэзідэнцкай прэміі па ахове здароўя, выдатнікам аховы здароўя. У 2014 годзе яму прысвоена званне «Чалавек года Віцебшчыны». Акрамя таго, Яўген Васільевіч - лаўрэат другой ступені конкурсу «Лекар года Рэспублікі Беларусь» 2010 года ў намінацыі «Лекар агульнай практыкі», пераможца абласнога конкурсу «Лепшы ўрач 2010 года» ў намінацыі «Лепшы ўрач агульнай практыкі».

«Голас Сенненшчыны», Таццяна Буракова.

Фота аўтара.